Ndihma e shpejtë pranë fëmijëvë jetimë

Ebu Hurejra (Allahu qoftë i kënaqur me të) tregon se Profeti (a.s) ka thënë:

Kush ia largon besimtarit një brengë nga brengat e kësaj bote, Allahu do t’i largojë atij një brengë nga ato të ditës së gjykimit. 

Kush e lehtëson atë që është në vështirësi, Allahu e lehtëson në këtë botë dhe në botën tjetrë 

Më datë  19.10.07 u organizua nga Shoqata Kulturore “Gruaja” shpërndarja e pencioneve të fëmijëve jetimë.

Nga shoqata u ftua një doktoreshe, motër myslymane, e cila do t’i mësonte fëmijët dhe do t’i jepte disa këshilla se si të ndihmonin veten e tyre apo të afërmit kur të kishin nevojë për një ndihmë të shpejtë.

Pra, tema që mbajti doktoresha ishte: “Ndihma e shpejtë na ndihmon të gjithëve” .

Doktoresha e hapi këtë takim duke i folur fëmijëve për disa nga sëmundjet që fëmijët njihnin më shumë,  të tilla si: dhembja e kokës kur sëmureshin me grip, dhembja e grykëve kur ata ftoheshin, dhembja e barkut dhe shumë të tjera.

Por, jo vetëm kaq, doktoresha u tregoi njëkohësisht fëmijëve se si duhet të kujdeseshin për veten e tyre kur ndodheshin para këtyre simptamave. Gjithashtu, doktoresha i këshilloi  fëmijët për mënyrën e të ushqyerit. Ajo i tha fëmijëve se me sa kujdes duhet të ushqeheshin dhe se me sa kujdes duhet të përtypnin ushqimin gjatë ngrënies, sepse një gjë e tillë ndihmon shumë në tretjen e mirë të ushqimit. Madje ajo i këshilloi fëmijët se nuk duhet të  flisnin apo të luanin gjatë kohës kur ushqeheshin, sepse kjo gjë përbënte një rezik shumë të lartë që mund të shkaktonte mbytjen e tyre nga ushqimi.

 Fëmijët  u treguan aktiv gjatë këtij takimi. Disa fëmijë kujtuan rastet kur ata ishin sëmurë me një dhe se çfarë ilaçesh kishin marrë për të kurar atë sëmundje dhe se çfarë kishin ndier në ato momente.

Ata, madje morën pjesë edhe në disa ushtrime të tilla, si: se si të lidhnin fashon nëse dora vritej,      

si të lidhnin këmbën nëse ajo vritej, se si të vinin leokoplastin në mënyrë që të ai të vihej sa më mirë dhe në mënyrë higjienike, etj.

Doktoresha i mësoi fëmijëve pjesët e trupit të njeriut me anë të një kukulle eksperimentale, e cila shërbente për këtë punë.

Gjithashtu doktoresha u mësoi atyre se si të masnin temperaturën, u mësoi atyre se cilat ishin disa prej medikamenteve që ata duhet të dinin në qoftë se sëmureshin me grykët, apo kur të vriteshin lehtë.

Por, gjithashtu doktoresha u tregoi fëmijëve se cilat ishin disa prej llojeve të termometrave që shërbejnë për matjen e temperaturës dhe se si mund ta masnin atë në mënyrën më të mirë të mundshme.

Të gjithë u larguan të kënaqur dhe të gëzuar, se tani ata, në njëfarë mënyre, do të dinin të kujdeseshin për veten, nëse do të kishin ndonjë incident të vogël në të ardhmen.

I dërguari i Allahut ka thënë: “Unë dhe kujdestari i jetimit do të jemi si këto në  xhenet dhe bëri me shenjë në gishtin tregues dhe gishtin e mesëm.”

GËZIM I PËRBASHKËT

Pranë njëri –tjetrit

QËNDROJMË SË BASHKU

Kjo është një ndjenjë e veçantë shpirtërore që duket se me pavarësinë e Kosovës në prag po e shijojmë të gjithë.. por për mua kjo është akoma më shumë, pasi kjo që shoh sot unë në këtë amfiteatër dhe kudo në trojet tona, ka të bëjë me një emancipim familjar, arritje atdhetare dhe pasqyrim të një qytetarie të veçantë, për t'ju lënë brezave të ardhshëm përfundimisht një kolorit të çmuar vlerash njerëzore e kombëtare, që do të bëjnë historinë e Ballkanit në shekullin që sapo filloi.

Dhe nuk ka gjë më të madhërishme se të arrishë kënaqësinë e Allahut, t'i shërbesh çështjes islame, atdheut, dhe të integrosh kulturën dhe artin, emrin e mirë të bijave shqiptare, dhe identitetin kombëtar, në tokën e të parëve, ta bësh atë pjesë të përspektivave më shpresëdhënëse të Ballkanit multikulturor. Kliko për të parë materialin e plotë..

Shoqata në ndihmë të jetimëve

 Prej një viti Shoqata Kulturore Gruaja ka hapur një projekt për të ndihmuar jetimët. Prej aktiviteteve që janë zhvilluar me këta jetimë përmendim veprimtaritë sipas muajve përkatës që nga fillimi këtij projekti.

Për muajin shtator

kur kemi filluar dhe shpërndarjen e pensioneve kemi organizuar takime njohjeje me jetimët dhe nënat e tyre. Gjatë këtyre takimeve ne i kemi njohur ata me Shoqatën tonë dhe aktivitetet e saj. Gjithashtu, ne jemi njohur nga afër me ta dhe me problemet që i shqetësojnë. Për këtë kemi marrë angazhim të organizojmë aktivitete të tjera në shërbim të tyre

Në muajt tetor-nëntor:

Shoqata jonë me rastin e muajit të Ramazanit, ka shpërndarë ndihma ushqimore për familjet muslimane të varfëra, si dhe për familjet e jetimëve në nevojë.

Në muajin dhjetor:

  Shoqata Kulturore “Gruaja” organizoi një takim me disa prej familjeve të jetimëve, në të cilin u mbajt një ligjëratë. Tema e kësaj ligjërate ishte “Rëndësia e edukimit të fëmijëve dhe veçanërisht të jetimit” dhe ajo u mbajt nga Samira Ademi, një bashkëpunëtore e shoqatës. Në këtë takim doli në pah roli i pazëvendësueshëm që ka familja dhe të gjithë ata që përkujdesen për jetimin në edukimin sa më të mirë të tij. Gjithashtu u fol dhe për rëndësinë e përkrahjes së jetimëve në çdo hap të jetës, duke i përgatitur ata sa më mirë për përballimin e vështirësive që ajo paraqet.

Nënat e jetimëve përfituan nga kjo ligjëratë dhe kërkuan që ligjërata të tilla orientuese të zhvillohen edhe në të ardhmen.

Po ashtu, në këtë takim u mbajt edhe një konsultë mjekësore nga Dr. Remzie Dauti, mjeke dhe bashkëpunëtore e shoqatës.

Në muajt janar dhe shkurt 2006:

Në takimin për ndarjen e pesioneve të jetimëve të shoqatës u organizuan dhe aktivitete të tjera si mësimi i disa sureve nga Kurani dhe njohurive të ndryshme rreth Islamit.

Po ashtu, u zhvillua një bisedë e ngrohtë me jetimët, ku u fol për ecurinë e tyre në shkollë dhe prolemet që ata i shqetësonin më shumë.

Vështrim i ri në çështjen e gruas

Reportazh për promovimin e librit të autorit Muhamed Fet’Hullah Ez-Zejadi

Në datën 16. 02. 2005 në ambientet e Hotel Tirana International u zhvillua promovimi i librit “Vëzhgime në çështjet e gruas” me autor Muhamed Fet’Hullah Ez- Zejadin. Në këtë takim ishin ftuar ambasadori i Libisë në Tiranë,  z. Moulud Al-Hamudi, atasheu kulturor pranë kësaj ambasade, z.Mohammed El-Mehdawi, znj. Iris Maçi, përgjegjëse e Sektorit të Gruas në KMSH, si dhe shumë gra të tjera nga fusha të ndryshme të jetës, si: Dr. Ilmie Mara, kryeredaktorja e revistës “Familja” Dr. Ruzhdie Qafmolla,  piktorja Igbal Bali, si dhe shumë intelektuale të tjera dhe studente nga degë të ndryshme.

Fjalën e hapjes e mbajti kryetarja e Shoqatës Kulturore “Gruaja”, znj.Ndriçime Zekaj, e cila pasi i uroi të ftuarat për mirëseardhjen, bëri një paraqitje të shkurtër të aktiviteteve të kësaj shoqate në përgjithësi, duke përfshirë aktivitetin madhështor “Karvani i femrës muslimane”, planin e aktiviteve që do të bëhen për jetimët, aktivitetet që do të bëhen me studentet, si dhe aktivitetet që do të bëhen në fushën e botimeve.

“Libri që ne sot promovojmë, -tha znj. Zekaj,- është përkthyer në mënyrë profesionale nga z.Gentian Bodlli, i cili ka bërë që Dr. Zejadi të flasë shqip për lexuesin shqiptar.

Falënderimi i takon Organizatës së Thirrjes Botërore Islame për mbështetjen financiare, pa të cilën, ky libër do të ishte e vështirë të realizohej.

Po ashtu, - vijoi znj. Zekaj, -janë edhe shumë libra të tjerë që presin të botohen së shpejti, për të përcjellë më tutje vlerat që i janë aq shumë të nevojshme për çdo familje shqiptare sot. Mund ta quajmë një zë më tepër në mbështetje të rrugës që duhet të ndjekim, për të arritur deri te rezultatet e nevojshme mbi edukatën e shëndoshë familjare, bashkëshortore mes të rinjve dhe të rejave.”  

Fjala e saj u ndoq nga ajo e kryeredaktores së revistës “Familja” Dr. Ruzhdie Qafmolla.

Në fjalën e saj, Dr. Qafëmolla nënvizoi: “Familja është intitucioni më i lartë i një shoqërie, që e ka hyjnizuar vetë Allahu. Baza e familjes është gruaja, nga e cila varet jo vetëm familja, por e tërë shoqëria. Gjysma e botës është femra dhe e gjithë bota edukohet nga ajo. E parë në këtë këndvështrim gruaja luan një rol mjaft të rëndësishëm, jo vetëm në aspektin familjar, por edhe në atë social.”

Më pas Dr. Ruzhie Qafmolla bëri një paraqitje të shkurtër të përmbajtjes së pesë vëzhgimeve. Në fund vlerësimin e këtij libri e bëri në këto plane:

 “Në planin edukativ:

Në këtë libër trajtohet një temë mjaft interesante, e cila ka të bëjë me edukimin jo vetëm të gruas në përgjithësi, por veçanërisht të brezit të ri me normat e moralit islam.

Në planin social:

Ky libër do të shtojë fondin e literaturës isalme, ku çdo familje do ta përdorë në shërbim të saj. Një libër i tillë nuk do të largohet nga dora e çdo muslimani të vërtetë, jo vetëm për konceptet e reja që duhet të ketë gruaja dhe familja muslimane sot, por edhe për mënyrën se si shkruhet ky libër.

Në planin aktual

I përgjigjet kohës dhe autori ka arritur të bëjë një ndërthurje me të vërtetë shkencore të problemeve sociale të gruas ndërmjet Islamit dhe Kuranit.”

Më pas fjalën e mori ambasadori i Libisë z. Mouloud Al-Hamudi. Z.Ambasador falënderoi Shoqatën Kulturore “Gruaja” për ftesën dhe për promovimin e këtij libri dhe tha: “Është një kënaqësi që një autor i vendit tim të flasë shqip. Kjo do të thotë se nuk ekzistojnë kufij shpirtërorë midis këtyre dy vendeve, Shqipërisë dhe Libisë, pavarësisht se ndahen nga një oqean. Në bashkëpunime të tilla lidhjet midis dy vendeve bëhen gjithnjë e më të afërta.”

 Në fjalën e tij ai foli për figurën e gruas në përgjithësi, duke theksuar edhe njëherë vlerat e gruas, që autori i librit, z.Zejadi, i ka trajtuar në librin e tij. “Na bën të jemi krenar që një autor libian të ndihmojë në shtimin e librave të bibliotekave shqiptare. Dy janë problemet që dua të shkëpus nga ky libër: E para, që ka lidhje me barazinë dhe drejtësinë islame.

E dyta, problemin e martesës dhe të poligamisë.

Shumë autorë e japin gruan të vuajtur, të nënshtruar. Problemi i pligamisë është shumë i diskutuar. Disa e konsiderojnë si nderim për gruan, kurse të tjerë si pengesë, përulje. Zejadi ka ditur ta zgjidhë këtë me anë të thënieve dhe fjalëve të Kuranit.”

Më pas për të krijuar një atmosferë më të ngrohtë dhe çlodhëse, Freskida Miloti, studente në Fakultetin Histori-Filologji, dega Letërsi dhe Gjuhë shqipe, recitoi poezinë “Motrës sime”, shkruar nga një motër muslimane, Kozeta Boçi, mësuese në medresenë “Vexhi Buharaja” në Berat.

Përfaqësuesja e grupit të studenteve, Eriselda Jorgji, foli për figurën e femrës në kohë, për vendin e saj në shoqëri dhe për krijimin e familjes. Shumica e familjeve janë famolje patriakale, ku burri luan rolin kryesor. Lidhur me këtë them se gruaja luan një rol të rëndësishëm jo vetëm në familje, por edhe në shoqëri. Familja është baza e shoqërisë, pasi kur nga një nënë lindin dhe edukohen individë të  kulturuar, atëherë kombi bëhet më i fortë. Gjithmonë gruaja nuk ka pasur të drejta për të vendosur, të therët kanë vendosur për të. Me ardhjen e Islamit gjithçka ndryshoi. Gruaja mori vendin që i takon.

Takimi vazhdoi me fjalën e përkthyesit të librit z. Gentian Bodllit, nëndrejtor në medresenë e Durrësit. Midis të tjerash ai tha: “Është një përgjegjësi e madhe të përkthesh një autor nga një vend tjetër dhe të dish t’ia sjellësh atë lexuesve, është një përgjegjësi të përkthesh librin e Dr. Zejadit, një penë shumë e njohur në fushën e letrave dhe të kulturës, jo vetëm në Libi, por edhe në botën islame. Jam përpjekur që t’i qëndroj besnik shkrimit të Dr.Zejadit, por dhe njëkohësisht të di si t’ia sjell lexuesit shqiptar, mënyrës së jetesës dhe botëkuptimit të tyre. Nuk do të ndalem shumë në përmbajtjen e librit, për të mos ju shuar kureshtjen, pasi të gjithë ju e keni në dorë dhe do ta lexoni atë. Librat që  flasin për gruan janë të shumta. Autori na vjen me një stil filozofik, që me pak ajete dhe hadithe jep problemet e gruas. Na jep përgjigje për shumë pyetje që na kanë dalë. Ashtu si thotë autori, “që të jem i sinqertë me atë që shkruaj”, edhe unë jam munduar të jem i sinqertë me atë që kam përkthyer. Megjithëse autori është arab dhe ka jetuar në vendet arabe, duket sikur ka jetuar në Europë, madje dhe në Shqipëri, pasi jep shumë mirë mendimet dhe mënyrën e jetesës së tyre. Ju falënderoj për pjesëmarrjen dhe njëkohësisht falënderoj zotin ambasador që ishte i pranishëm në këtë promovim.”

Pas fjalës së përkthyesit e mori fjalën redaktorja e librit, zonjusha Jerida Kulla, redaktore e revistës “Familja” , organ i shoqatës kulturore “Gruaja”. 

“Libri që kemi në dorë është libri më i fundit i autorit Ez- Zejadi. Ky libër, për nga tematika dhe problemet që trajton, është i vlefshëm për të gjithë, jo vetëm për gratë muslimane, por për të gjitha gratë në përgjithësi. Autori është i vetëdijshëm për natyrën e punimit të tij. Me të drejtë ai e quan “Vëzhgime”. Vëzhgime për natyrën e gruas, botën, mendimet, dhe rolin e saj në shoqëri. Ky lloj punimi i lë dorë të lirë autorit, të dalë jashtë atyre piketave stilistikore, që dashje pa dashje i vendos vetë lloji i esesë, ashtu siç shprehet dhe vetë autori “i jep studimit një natyrë personale”. Ky personalizim ka bërë që gjithkush të futet lirshëm në botën e mendimeve, të jetës së gruas pa e kuptuar, pa dhunë dhe të dalë përsëri pa e kuptuar, po aq lirshëm, por me më shumë emocion dhe përgjegjësi për ndihmën që do të japë në zhvillimin e shoqërisë. Libri është ndarë në pesë vëzhgime. Secili prej tyre sa mund të qëndrojnë më vete, po aq s’mund të ndahen. Janë si gishtat e dorës, që gjithkush e ka të përcaktuar mirë vendin dhe funksionin e përdorimit.

Ka trajtuar figurën e gruas, të femrës në çdo drejtim, duke trajtuar problemet që në zanafillë të lindjes së tyre, duke dhënë shkaqet dhe arsyet që sollën këtë problem. Me një stil të qartë dhe të argumentuar, sa ndonjëherë të duket sikur luan me fjalën, autori ka ditur të zbërthejë figurën e saj. Duke analizuar figurën e gruas, ai i bën një operacion shoqërisë, jo vetëm kësaj që po jetojmë, por edhe atyre që kanë kaluar e që do të vijnë. Lidhur me këtë do të thosha se autori, dashje pa dashje i është përgjigjur kësaj pyetjeje: Si ka qenë, si është dhe si do të jetë gruaja?

Kjo pyetje përfshin tre kohë, tre gjendje të pozicionit të saj në jetë, rolin që ka luajtur në zhvillimin e shoqërisë. Figura e gruas jepet e kompletuar, duke e krahasuar me shembuj të tjerë si: burrin apo “femrën bashkëkohore europiane”. Ka studiuar femrën në përgjithësi dhe atë muslimane në veçanti në të gjitha aspektet e saj, si nënë, grua apo si bashkëshorte. Për secilën prej tyre nxjerr edhe detyra: (faqe 24) …sepse gruaja e ka një detyrë kryesore, që është ruajtja e llojit njerëzor, përgatitja e brezit të ardhshëm dhe përkujdesja për të.

…pjesëmarrja e saj në ndërtimin e shoqërisë njerëzore, brenda mundësive dhe aftësive që i përshtaten asaj. Kur gruaja kryen detyrën e saj kryesore dhe merr pjesë me aq sa mundet në detyra dytësore, ajo patjetër që do ta kalojë burrin në lumturi personale dhe do ta arrijë këtë duke luajtur rolin e saj femëror, të cilin nuk mund ta zëvendësojë me asnjë rol tjetër.

E, pra, këto janë dy detyrat që ecin paralel me njëra-tjetrën dhe nuk di se kë të shkëputësh. Femra muslimane nuk është ajo e shumë viteve më përpara, kur prindërve u vinte turp nga ato dhe i mbulonin të gjalla. Atë e gjen në çdo fushë të jetës, dhe kjo falë barazisë dhe të drejtës që Zoti i ka dhënë në Kuran.”       

Motra muslimane Sabina Fejzullaj, studente në Fakultetin e gjuhëve të huaja, foli për kapitullin e hixhabit. “Pavarësisht librave të tjerë që trajtojnë këtë temë, ky libër më është dukur më interesant për mënyrën se si i trajton temat e ndryshme, e pikërisht atë të hixhabit.

Citimi në këtë libër i disa prej ideve të gabuara që ekzistojnë edhe sot për mbulesën, bën që të ndërgjegjësohemi dhe më shumë për vlerën e zbatimit të këtij urdhri kuranor. Ky trajtim është shumë i dobishëm për mua si muslimane dhe aplikuese e mbulesës.

Një pikë interesante është trajtimi njëkohëkohësisht i komponentëve të rëndësishëm, siç janë: morali dhe besimi, që së bashku me mbulesën ndihmojnë në ruajtjen e normave dhe vlerave shoqërore.

Uroj që ky libër dhe mesazhi i tij të bëhet pjesë e jetës së çdo gruaje. Dua të falënderoj shoqatën kulturore “Gruaja” që bëri të mundur botimin e tij.”

Më pas një motër muslimane, Irida Draçi, praktikuese e re e mbulesës,  tregoi   për pengesat që kishte kaluar, qoftë nga familja, qoftë dhe nga shoqëria, për të zbatuar këtë urdhër.

Takimi u mbyll me poezinë “Nëna ime”, shkruar nga Kozeta Boçi, recituar nga menaxherja e kopshtit “Vila Jeshile”, Nevila Qafmolla, duke i dhënë këtij takimi nota familjare dhe të ngrohta, që secila nga të pranishmet do ta ruajë në kujtesën e saj.

AKTIVITETET E SHOQATËS KULTURORE “GRUAJA” NË VITE

Për t’u njohur nga afër me njё pjesё tё aktiviteteteve tё Shoqatës Kulturore “GRUAJA” ju ftojmё tё lexoni materialet nё vazhdim:

 Me themelimin e saj, Shoqata Kulturore “GRUAJA” ka organizuar njё sёrё tryezash e takimesh me gratё shqiptare pёr tё bёrё tё njohur programin e saj dhe pёr t’i ftuar ato tё jepnin kontributin e tyre nё shёrbim tё realizimit tё objektivave tё shoqatёs.

 Në periudhën e vështirë 1998-1999 të krizës kosovare ofroi ndimesën e saj të pakursyer dhe iu gjend afër refugjatëve kosovarë duke iu ofruar ndihma të shumanëshme si strehim, ushqim dhe u kujdes për ta deri në momentin e rikthimit në trevat e tyre pas përfundimit të luftës. Eksperienca në këto momente të vështira i dha kësaj shoqate një forcë më të madhe për të vazhduar misionin e saj.

 Në nëntor të vitit 2000 me inisiativën dhe përkujdesjen e Shoqatës Kulturore ““GRUAJA”” në kuadrin e promovimit të revistës “Familja” u zhvillua në Tiranë simpoziumi i gruas muslimane me temë “PRESPEKTIVAT E GRUAS MUSLIMANE NË SHEKULLIN E RI”. Po në këtë vit përfaqësueset e kësaj shoqate morën pjesë në takimin ndërkombëtar të femrave muslimane në Sherikah të Emirateve të Bashkuara Arabe.

 Gjatë vitit 2001 shoqata “GRUAJA” organizon seminarin e gruas muslimane 2001 me temë “FEMRA E EDUKUAR SIPAS ISLAMIT, GARANTI MË I MIRË PËR NJË SHOQËRI TË SHËNDOSHË”

 Aktivitet e kësaj shoqate vazhdojnë me aktivitete ndërkombëtare. Po në vitin 2001 në Sherikah të Emirateve të Bashkuara u mbajt takimi me temë “RRITJA E ROLIT KULTUROR TË VAJZËS MUSLIMANE”, ku ishin të ftuara përfaqësuese të kësaj shoqate të cilat pas takimit të parë e përfaqësuan në mënyrë dinjitoze femrën intelektuale shqiptare.

 Në kuadrin e aktiviteteve sociale kjo shoqatë ka hapur një zyrë të re për konsultime familjare e cila synon t’i vijë në ndihmë familjeve shqiptare në etapën e zhvillimit shoqëror e social . Ajo ka si mision të ndihmojë vajzat dhe gratë në gjetjen e zgjidhjeve sa më të mira për të ardhmen e tyre dhe njëkohësisht të sensibilizojë opinionin shoqëror në drejtim të fenomenit të dhunës ndaj fëmijëve dhe grave si dhe të trafikimit të tyre.Kjo zyrë gjithashtu synon t’u gjendet pranë dhe të ndihmojë moshën e tretë në mënyrë që mos ta ndiejnë veten të vetmuar dhe të braktisur.

 Aktivitetet e kësaj zyre shkojnë më tej me organizimin e takimeve me gra intelektuale siç ishte takimi me temë: “SI MUND TË EVITOJMË DHUNËN NË FAMILJE” e organizuar në mars të vitit 2002.

 Shoqata Kulturore “GRUAJA” në vazhdim ka organizuar simpoziume fetaro-kulturore në rrethe të ndryshme të Shqipërisë, siç ishte simpoziumi i këtij lloji i mbajtur në Shkodër nё fund tё vitit 2002 me pjesëmarrjen e shumë intelektualeve.

 Duke i rritur në një shkallë të ndjeshme veprimtaritë e saj, Shoqata Kulturore “GRUAJA” ka organizuar tryeza të rrumbullakëta me studente, gra të moshave dhe profesioneve të ndryshme për të diskutuar rëndësinë e familjes dhe edukatës fetare për edukimin qytetar dhe demokratik të vajzave dhe femrave shqiptare.

 Shoqata ka organizuar nё mёnyrё tё vazhdueshme kurse verore për kualifikime në fusha të ndryshme si rrobaqepsi, kompjuter, gjuhë të huaja e besim të ndërthurura këto me veprimtari të ndryshme kulturore.

 Po ashtu në lëmin e aktiviteteve tё shoqatёs janë edhe iftaret e ndryshme të organizuara nga Shoqata Kulturore “GRUAJA” në periudhën 2002-2003. Iftaret janë organizuar për studente, gra të profesioneve të ndryshme e intelektuale me rastin e muajit të Ramazanit në qytetet Shkodër, Kavajë, Tiranë, Mamurras etj. Vlen të përmendim se në këto lloj aktivitetesh ka pasur njё pjesёmarrje masive por edhe tё ftuar nga fushat e kulturёs, shkencёs e shoqёrisё civile.