Festa e Kurban Bajramit vërteton përuljen e besimtarëve, nënshtrimin ndaj urdhrave të Allahut dhe vërteton vendosmërinë për të qenë adhurues vetëm të Allahut (xh.sh) dhe kurrsesi robër të interesave dhe të mirave materiale. Sakrifica apo flijimi në emër të Krijuesit, merr një karakter të vërtetë moral, shpirtëror e njerëzor dhe na nxit të gjithëve të përgatitemi për sakrifica edhe më të mëdha në emër të Krijuesit tonë.

Shoqata Kulturore “Gruaja”, në bashkëpunim me Organizatën Botërore të Ndihmave  realizoi projektin e kurbaneve për vitin 2007, duke u shpërndarë kurbane jetimëve që marrin pension pranë Shoqatës Kulturore “Gruaja”, studentëve, si dhe njerëzve në nevojë, me qëllim lehtësimin e vështirësive që hasin në jetën e përditshme dhe që të gjithë së bashku të festojmë festën e Kurban Bajramit, që të përkujtojmë të gjithë emrin e Allahut (xh.sh), e ta falënderojmë për ato që na ka dhënë.

Kjo është nga punët më të mira për të cilën ne nxitemi që  ta realizojmë sa më mirë, duke u bazuar në fjalën e Allahut të lartësuar: “Hani prej saj dhe ushqeni me të edhe të varfrin.”, si dhe në një hadith të Profetit (a.s), të cilin e transmeton Zejd bin El-Erkami thuhet:

“I thamë, o i dërguari i Allahut, çfarë janë këto kurbane?”

U përgjigj: “Është rruga e babait tuaj, Ibrahim (a.s).””

Gjatë këtij aktiviteti foli  drejtoresha e shoqatës kulturore  “Gruaja”,  znj. Ndriçime Zekaj, e cila i uroi të pranishmëve “Gëzuar festën e Kurban bajramit”, si dhe falënderoi me shumë përzemërsi Organizatën Botërore të Ndihmave për kontributin që dhanë për realizimin dhe  shpërndarjen e këtij kurbani, duke shpresuar që bashkëpunimi me këtë shoqatë do të vazhdojë edhe në të ardhmen. Gjithashtu, përfaqësuesi i kësaj organizate, z. Edmond  Salihu, falënderoi nga ana e tij donatorët e këtij projekti, si dhe bëri një panoramë të aktiviteteve që do të organizohen në të ardhmen për të ndihmuar jetimët dhe njerëzit në nevojë. Shpresojmë se me punën tonë arritëm të ndihmojmë sadopak këto nëna dhe familjet e tyre.

Përfaqësuesi i projektit “Në ndihmë të studentëve”, z. Eris Koliqi, foli për rëndësinë që ka ky fakt, shpërndarja e kurbanit pikërisht në këto kategori njerëzore. Edhe studentët, pavarësisht se gjendja e tyre ekonomike lë shumë për të dëshiruar, janë shprehur të gatshëm të ndihmojnë jetimët e njerëzit në nevojë, pasi të gjithë së bashku mund ta përballojmë më mirë e më lehtë vështirësitë, si dhe të gjithë së bashku të madhërojnë e të falënderojmë Allahun që jep njerëz të mirë që ndihmojnë njëri –tjetrin.